Uya

“Tolong mintak uya alus nyo sebungkus Bik”, uji Mek ke Bik Jahrah yang lagi sibuk ngeladenin ibuk-ibuk yang belenan di warungnyo. “Oii Mek Ilham, payo,,payo,, nak belenan apo lagi? Ado iwak gabus edup tuh nah di baskom,, lemak men dibuat pempek!”, uji Bik Jahrah sekalian promosi isi warung nyo.

Mek mesem-mesem cak bekasem, sambil jingok’i ibuk-ibuk yang sibuk meleh-meleh sayur. “Idak Bik, tadi aku lah belenan ke pasar, sekalian beli stok belenan bulanan”, uji Mek. “Payo men cak itu, ini uya alusnyo!”, ujik Bik Jahrah sambil tangannyo masuk’ke uya ke kantong asoy kecik warno item. Sigap Mek begancang metu ke selembar duet sepuluh ribu dari kelepehnyo. “ Nuh,, dak tek duet kecik po Mek Ilham?”, uji Bik Jahrah sambil ngubek-ngubek kotak tempat narok duet nyo. “Katek Bik,, maklumlah kan sekarang bulan mudo, jadi duet besak galo di jero kelepeh nih!!”, uji Mek berkelakar. Bik Jahrah langsung ngakak,, “Payo,,payo,, men cak itu!! Aku cari dulu duet sosk’an di jero ye,, caknyo ado”, uji Bik Jahrah langsung masuk ke jero rumahnyo.

Sambil nunggu Bik Jahrah metu, Mek ngawas-ngawasi bungkusan uya belenan nyo. “Caknyo, ini bukan uya yang biaso aku beli!”, uji Mek sambil jingok tolesan pabrek tempat beken uya. “Cacam Bik Jahrah!!! Alangke jaohnyo uya ni nyebrang!!”, uji Mek waktu Bik Jahrah la metu dari rumahnyo.

“Ooh.. iyo Mek, itu uya bekenan Negara nyo si Sharul Khan!, kato wong pasar tempat aku belenan katonyo uya nih bagus, lebeh bagus dari bekenan wong madura. Uya kualitas nomor satu!”, uji Bik jahrah ngenjuk penjelasan.  Mek laju ngawas-ngawasi lagi bungkusan uya di jero kantong asoy, “yo nian ye, uya ini warno nyo lebih putih terus dak begumpel cak biasonyo uya yang aku beli”, uji Mek jero ati.

“Nah, men cak itu, kalu kito beli uya nyo si Syarul Khan galo, cak mano naseb uya di Madura? Pacak dak laku dio!, padahal kan banyak wong madura yang pencariannyo ngandalke jadi petani uya”, uji Mek. “Iyo jugo ye Mek Ilham!”, sekali ni Buk Solihin yang dari tadi nengerke cerito Mek dengan Bik Jahrah melok ngomong. “Tapi Mek, dilema jugo untuk kito, cubo kito jingok, laen nian kualitas uya bekenan Negara Sharul Khan dengan uya bekenan wong kito, padahal rego nyo samo. Tau deweklah ibuk-ibuk, pasti meleh yang bagus dan rego murah”, uji Buk Solihin ngenjuk pendapat.

“Memang jadi dilema buk Solihin, tapi harus nyo ini jadi ujian dan pelajaran untuk bangso kito!”, uji Mek nambahi sambil tetap mesem-mesem. “Nah, ujian dan pelajaran cak mano Mek?”, sekali nih Bik Jahrah yang nanyo sambil garuk-garuk palak. 

“Yo, ujian  dan pelajaran tuk Bangso kito Bik, seberapo cinto nyo bangso ini dengan bangsanyo dewek, seberapo pedulinyo bangso kito yang katonyo Negara Kesatuan Republik Indonesia dengan bangso se tanah air nyo, dan seberapo pacak kito yang uji nyo bangso Indonesia ngerego’i hasil alam nyo”, uji Mek sambil jingok Bik Jahrah yang tambah nemen garuk-garuk palak nyo, entah apo gara-gara dak ngerti apo kutuan. :D

“Nah, men sekali ni aku akor sam Mek Ilham, kan negara kito nih punyo gudang uya di Madura, madak’i kito jauh-jauh nyeberangke uya dari luar negeri sano. Trus cak uji Mek Ilham tuh, ini ujian bangso kito samo-samo untuk naekke kualitas uya para petani di Madura. Dak madak’i  Negara kito yang gudangnyo para peneliti dan ilmuwan yang konon sakeng banyaknyo sampe-sampe jadi peneliti dan ilmuwan di negara luar dak pacak ngatasi hal ini”, uji Buk Solihin berapi-api dan semangat 45, sakeng semangatnyo sekibet bayem jadi korbannyo diacung-acungke cak gaya Pak Karno lagi pidato.

“Nah kalu mak itu, payo kito ibuk-ibuk jugo melok peduli dak usalah cak-cak nak kebelagak’an make produk luar negeri, kan produk dalem negeri nih banyak jugo yang bagus.”, uji Mek tambah mesem-mesem cak asem.

“Laju cakmano dengan uya nih?”, tanyo Bik Jahrah merengut. “sebenernyo aku nih nyesel la tebeli uya si sharul khan ini, tapi dak po-po lah,, anggap be aku lagi peduli samo bik Jahrah, tapi besok-besok kalu pacak bik Jahrah jual uya dari pulau buk Bariah be ye..”, uji Mek ngakak. “Iyo Mek, nyesel aku te ulok wong pasar tuh!”, uji Bik Jahrah sambil rai nyo dilepet-lepet cak kue nagosari.

“Nah payo, aku balek dulu ye,, la siang ari nih, belum masak!”, uji Mek ke galo-galo ibuk-ibuk yang belenan. “Payo..payo.. Mek Ilham, gek kabari kami yo?”, uji Buk Solihin sambil ngedip-ngedipi mato nyo. “Nuh, ngabari apo buk?”, sekali nih Mek yang dak ngerti maksud omongan buk Solihin. “Yo kabari kami, kalu-kalu be dengan Mek Ilham beli uya si Sharul Khan dapet bonus tari chaiya..chaiya,,, dari Bik Jahrah!”, uji Buk Solihin ngakak dak keru-keruan sambil ngelirik ke Bik Jahrah yang rainyo tambah belepet.

---------
sumber gambar : google image